Kada uli nako sa among lungsod, di gyud nako malikayan nga maagian ang akong kanhi nga eskuwelahan.  Usahay makatawa ko nga maghandom sa akong elementary days.   Ang makapahimuot gyud nako,  kanang makahinumdum ko sa panahon nga ang mga nurses sa DOH magpanon na padung sa eskuwelahan aron mo bakuna sa mga bata.   Ang mga bata magkaguliyang, manghilak, moambak sa bintana, mosuong sa lamisa, kuwang na lang motago sa palda sa maestra. Inig kita gyud  sa mga nurse nga magdala na sa ilang itom nga mga overnight bags,  unya aduna dayoy announcement nga isibya, way kunoy makaguwa kay naay “indeksyon”! Whaa!

Dili tinusokay ang atong hisgutan  karon kundi ang presko pa nga mga nanghitabo,  ang  Pinoy Independence Day ug ang niaging Eleksyon, ato na lang ishorcut ug  “Indeksyon”.

Unahon nato kanang Elitson, oops Eleksyon diay.

Sa akong pagtan-aw ang pagsaulog sa Independence Day, himuon aron mapukaw ang dungog ug garbo sa Pinoy.   Para nako, usa lang ni sa mga kalihokan aron ang mga Noypi taas kilay nga magpaka Pinoy dinhi sa NZ.   Apir ko ana! kay bisan og unsaon may abilidad gyud ang Pinoy, bisan og asa ilabay.   Apan kon atong teleskopyohan ang kahimtang sa Pinas karon,  unsaon man pagka independent kon ang liog sa mga Pinoy gikwentasan ug makalipong nga utang.  Hangtod na sa mga apo sa kuko apil na og bayad sa utang, pwera lang kon mohatag si Pacman ug pipila ka milyon inig ka knockout ni pareng Floyd.  Daghan ra ba siya og pasalig sa iyang pangampanya,  simbako palayo kon si Pacman maoy mataymingan sa kumo ni Floyd, dili na bandera ang mawara-wara kundi ang tiil unya ni Pacman nga nalukapa.   Kanang celebration, maayo man,  ang mga pasundayag makalingaw,  kadaiyang pagkaon atong matilawan, ang ako lang, nga hinaut unta nga human pamaoli  atong mga apapangig sa kinatawa ug kinaon, atong malingi ang atong mga kababayan nga karon wa pa gyuy independence batok sa pagkakabus.

Kadto ra segurong eleksyon sa KBNZ niadtong June 26,  pwera buyag, ang way trampas og hapsay ang dagan.  Wa ko kadungog og vote-buying, wa pud ko kita og mga goons.  Duha ra gyuy nadisgrasya, ang duha ka baboy nga gilitson nga way kalooy gi tusak-tusak sa mga bisdak. 

Kay musikero man lagi ta nga hilaw, di gyud nako palabyon kon mobisita ang mga sikat nga banda dinhi sa  Auckland.  Sa mga concerts nga ako na nga nakit-an, kadtong concert sa Train – Save me San Francisco Tour, para nako sulit gyud sa bayad.  Ang repertoire complete sa ilang mga sikat nga kanta, gikan sa “Drops of Jupiter” hangtod sa latest nga hit “Soul Sister”.   Ang Powerstation, igo gyud nga lugar kay duol kaayo ang audience sa mga musikero.  Inig balik nila next year, bantayi gyud mga bisdak. 

Sa sunod na pud bay! Abante bisaya!