Samtang nagdokdok ko aning computer, ako sab nga gisigi ug atang ang announcement para boarding sa akong flight padung sa Cagayan de Oro.  Haay naku! Ang among flight gahapon padung sa Butuan gi-kanselar tungod sa baga nga dag-um ibabaw sa Bankasi airport. 

Duha na katuig gikan sa akong katapusang pagbisita niining yutang natawhan sa mga bisdak – Cebu.  Gawas sa budget nga makalipong, first episode sa drama mao gyud ang pagpili ug eroplano nga atong sakyan. Gawas sa domestic trips, amo na gyud nga naandan ang Singapore Air kay diretso man sa Cebu, apan kining biyahia, via Manila mi, unya kay taas noo Pinoy lagi ta, akong gipamalihug ang akong travel agent nga suwayan ang PAL,

Haay naku! Ang eroplano gikan sa Sydney, karaan man diay, usa ra ka TV ang naa sa tunga sa aisle, unya hanap pa gyud kon naa ka makalingkod sa kilid sa eroplano.  Oks na lang - ako lang imanok-manok ug tulog ang kalaay sa long trip. Ang pagkaon ug ang drinks wa na lang nako panumbalinga kay mura ra man ug baligya sa Balmoral.

Apan, ang dili gyud nako matulon, mao ang hakog nga polisiya sa PAL karon, - pag charge ug excess baggage inig balhin nimo ug sakay sa domestic flight gikan sa overseas flight. Sa mga miaging tuig, kon gikan ka ug overseas flight via PAL ang imong baggage allowance inig balhin nimo sa domestic flight, ila nga ikonsiderar ug 20 kgs.  Apan karon murag haros ang ilang liog nga mag lingo-lingo ug arogante pa gayud nga mokolekta sa excess baggage. Diay akong tip kon di gyud mapugngan nga mosakay ang bisdak ug PAL, kon adunay dako nga excess baggage, dagan dayon didto sa PAL cargo ug ipa airport to airport, makabarato ka ug dako. Ayaw na lang usiki ang inyong tinagawog ug kiwi accent sa paglalis, kay bisan kanang ilang airport manager haros pud ug liog nga maglingo-lingo.

Basin diay ug kining Cebu Pacific arang-arang ug serbisyo, akong gisuwayan kay mobisita man mi sa akong in laws didto sa Lianga, Surigao Sur.  Via Butuan ang among flight unya sugaton na mi sa SUV sa akong in-laws padulong sa ilang lugar. Naunsa man nga usa ka oras na mi nga natanggong sa eroplano unya gipakanaug man mi kay dili sila maka lupad tungod sa baga nga dag-um ibabaw sa Butuan airport.  Unsaon ta man, pagbuot man kini sa panahon – wa tay mahimo.  Kay Pinoy man, mura ug mga alampinig nga nabungkag unya dasok dayon ug guwa sa eroplano, maayo unta ug naay klaro nga instruction kon asa padung, haay naku! Bisan na lang ug giyahan ta ug asa maka re-book sa ticket, wa sa ta ron gyud ang Cebu Pacific, iyahay ug dumog ang mga pasahero. Linya singit-singit, ang nauwahi motunol ug ticket sa amigo nga tua sa unahan, bagotbot ug bagolbol all around.  Kay gubot man, left and right na ang pamalikas sa mga pasahero.  Ambot wang anus-a pa ang Pinas mahapsay.

Sa positive note, ako nga hisgutan usa sa mga maayong projects karon diri sa Cebu.  Grupo sa mga off-road enthusiast nagkahugpong ug mitukod sa Emergency Relief and Rescue group nga gihinganlan ug All-Terrain Medical Relief Organization (AMRO). Kay kadaghanan sa mga miyembro niini mga doctors man, angayan gyud nga makaserbisyo sila kon adunay kalamidad, simbako lang palayo, unya gikinahanglan ang ilang mga lig-on nga off-road vehicles aron pagdala ug mga rescuers, supplies, ug uban pa sa mga lugar nga dili unya maabot ug ordinaryo nga sakyanan.  Kudos sa mga lider niini sama nila ni Dr. Wyben Briones, Dr. Leon James Young Jr., Dale Gomez, ug sa daghan pa nga mga off-road enthusiast. 

Medyo gaduka-duka pa ko ug dokdok aning netbook dinhi sa pre-departure, ngitngit pa ra ba sa gawas, maayo unta ug di na makanselar. Maayo gani kay ang Bellavista hotel nipreparar namo intawon ug pamahaw bisan ug 3:30 pa sa kadlawon, at least naa nay sulod among tiyan.

Taym sa, boarding na diay mi, sunod na pod, babu!

Banat bisdak!